يررررررج ابليسك يا لميس قريح ..

جيت من الدوام امس هالكني الجوع ,

دخلت البيت و انا ادور اي ريحه اشمها , ثوم ,, بهارات , بصل على الاقل ,, اي شي يطبخ علشان اشمه ,
ماش ما فيه ريحه , اتجهت للمطبخ , لقيته على وضعه من امس بالليل ...
واسمع صوت التلفزيون شغال بأحد الغرف ...
اتجهت للغرفه ,,
لقيت ام الشباب منجطله عند المسلسل الغبي حق الاتراك و تبلع ايسكريم ..

قعدت اناظرها ,,
قلت ايووووووووه ,,, مافيه غدا صح ؟ !!

قالت بالحرف ( وش رايك ياعمري اليوم تقلبها باسكن روبنز توفي ) ,,

ناظرتها و قلت في بالي ,,
ولا قالت نقانق والا تونه على الاقل ..
ياووويل قلبي على هالبرود ,, مافيها امل اعديها على خير ...>>> ويليتني عديتها على خير ,,

رحت للمطبخ وجبت صحن وملعقه , ورجعت لمها وكانت على الكنب وبجنبها طاوله وفيها جالون الايسكريم وقارورة مويه وكاس بلاستيك فيه نصه مويه ,,
اخذت الجالون ورحت للجهه الثانيه للكنب وجلست وعبيت ايسكريم وقعدت اكل >>>> الزوج المطيع ..

الى ماجت الفرصه لي ,

جاء مشهد بالمسلسل لـــ ( لميس )..

عيوني موجهها للتلفزيون ..

قلت : تصدقين يا حياتي ,,
قالت : نعم ياقلبي ,,

قلت : البنت هذي تكب ملح ,
قالت : اي بنت ؟؟!!

قلت ( وعيوني بالتلفزيون ) : لميس اللموسه , البنت دلع و مزيووونه بقووه ورشيقه ...!!!!!! ورجعت اكل كأني ما قلت شي ,

بعدها ,

خمس ثواني ,, بس خمس ثواني .... ومن غير مقدمات ,

ما دريت الا فيه شي مر من عند راسي بسرعه قويه مره , يوم صك بالجدار ,
ناظرته ,, لقيته قارورة المويه ...
وما امداني التفت عليها ,, الا هذا كاس البلاستيك اللي نصه مويه ناشب في خدي ,,


جلست شوي احس منب بوعيي ,, على بال ما صحيت من اللي صار ,,

لقيت بنت الايه انحاشت لدورة المياه و سكرت على نفسها ..

طق ,طق , طق,,
افتحي الباب ,

لا ,,منب فاتحه ,

اقول افتحي الباب احسن لتس ,,

اقولك منب فاااااتحه ,, خل الحقيره لميس تطبخ لك بكرا ,,

انا اوريتس وشلون اخلي لميس تطبخ لي ,, و رحت وخليتها ...

ساعه ,, ساعتين ,, ثلاث ,, مافتحت ...

طلعت من البيت ورحت مشوار ,, يوم رجعت لقيت ام الشباب مرها اخوها و انحاشت لبيت اهلها ...


الززززززبده ,,

وشرايكم فيها ,,

وش اسوي فيها الحين ,,

ـــــــــــ

قصيميه لا تتهورين وتنقلين الموضوع الله يخليتس ...

ولا يهمك خلاص اوب ناقلته

..

اقول رااي فيك كزوج ولا راي في زوجتك ولا بالموقف


اول شي وش الاسباب الي خلتها ماتطبخ اذا ماتعرف معذوره اوما تعبانه معذوره كمان ولا تداوم وتجي هلكانه بعد معذوره اوما دلع تسذا لا والله موب معذوره

لازم انت تفهمها بوجبها كزوجه وانت بعد تعطيها كل حقوقها كزوجه يمكن قصرت بشي ولا شي

زوجتك
احس تعاملها راقي بس ينقصها السنع شوي


الموقف ومدحك للميس

اي المفروض ماقلت ياحلوها انت تعرف اكثر شي ينرفز البنت ان زوجها يطالع غيرها ولا انا اتسذب

حتى لو حلوه وتقطع التسبد امسك نفسك على الاقل قدامها وعند اصدقائك قل اللي تبي

..

امم روحتها لبيت اهلها مالها دااعي المفروض مارااحت عسى على كل شي ابزعل واروح عسى ماشر بس

الزوجه الذكيه تعرف كيف تقلب الموقف لصالحها لو اانا كان قلت حتى يحيى وش حلوه << يع يحيى هع

انت امسك نفسك واتركها كم يوم لين يليين اللي براسها شوي يمكن هي مليانه من ضغوط الحياة ومحتاجه رااحه كلم اخوها قل وش السالفه ؟ ؟ بعد لايكون كذبت عليهم وقالت شي انت ماسويته


واتمنى لك التوفيق يارب ..

حنون

لازم تمشيها لها مهما يكوون هي زوجتك ويمكن تعباانه عشان كذا ماطبخت لــــك
لاتعصب عشان اكل حرمتك اهم بس اذا مره ثانيه ماسوت لك هذاااك الوقت فهمها انها لازم تطبخ لك ولاتطنشـــــك :d





بس الصرااااااحه اعجبتني القويه هههههههههههاااي وربي انهـا فله
ليه تمدح لميس يمها الحرمه غااارت منها الله يعينك يالميس بجيك دعاااااااوي من زوجة حنون << هع


حنون لاتسوي شي في حرمتك

الحين ابغى اعرف علبة المويه والكاس الي جوك مزح او استهبال ولا جد

وهي راحت بيت اهلها مزح ولا جد

قصيميه .. باربي ... عبودي .. تسلمون على الطله ..

هي عارفه واجباتها كويس , لكن انها عجازه مرررره , ما تحب تطبخ ,, وما طبخت لانها كانت متعيجزه , بس هذا السبب ..
وانا مطاعم ما اكل منها ,, اكرههم ,, و الشغالات انقرف منهن ..

و هي انحاشت لبيت اهلها , يقالها خايفه , لأنها عارفه و ش بيجيها لو كانت قدامي ذاك الوقت ,, و لانها عارفه قوة اللي سوته ,

و انا بصراحه يوم اقولها ذاك الكلام عن لميس , مب قصدي اني معجب بالبنت فعلا ,, لا ,, >>>> ايه هين ..ههههههههههههههههه.

بس كان قصدي اني اقهرها بصراحه , لأنها غيور بشكل فظيع وعصبيه بنفس الوقت, وانا استغليت هذي النقطه ذاك الوقت ,,
وهي اسوي فيها اي شي الا اني اقعد امدح بنت عندها ,او تمدحني بنت عندها ,, هذا الموت الحمر عندها ... هذا اللي خلاها تخربها معي ذاك الوقت ..

اجل تقولي تغد ايسكريم , هذا اللي خلاني اقعد ادور اي شي يقهرها وابغى شي سريع ذاك الوقت , ولا توقعت بصراحه انها بتنجن و بتسوي فيني تسذا ,
ولا بعد ,, لو اقولكم وش تسوي احيانا من قوة الغيره اللي فيها كان تنهبلون من جد..

بس بصراحه كل ما تذكرت الكلام اللي قلته لها وردة فعلها عليه اجلس اضحك بقوووه ...



باربي السعوديه ..
لو انا اللي منشب الكاس في وجهها , كان بتقولين حرام عليك تسوي فيها كذا وهذي حرمه ضعيفه ومدري ايش ومن هالكلام..

بس علشانها بنت جنسك ,, طلع الوضع فله ,, هاه .. لازم تفزعون مع بعض يالحريم ..

ههههههههههههههههههههههههه


ايه شسوي لازم ادااااافع


:d

والله خلكم على وضعكم كذا عفويه وانسجااااااااااااااااااااااااااااااااااااااااااااا ااام


وفلــــــــــــــه وناسه حيييل.......

الله يخليكم لبعض

...


اشتري لها ملك شيك باسكن .. توفي مع فانيلا وكثر مكسرات وصوص وكريمه .. وروح بيت اهلها راضيها ^_^



ولاعاد تمدح لميس .. أمدح نور ^_^



..



احتراماتي



..